स्मशानभुमीमधील लाकडावरुन खुनाचा गुन्हा उघडकीस आणत वालचंदनगर पोलिस स्टेशन व स्थानिक गुन्हे शाखेच्या पथकाची कौतुकास्पद कामगिरी
बारामती /प्रतिनिधी – केवळ स्मशानभुमीमधील लाकडावरुन खुनाचा गुन्हा उघडकीस आणत वालचंदनगर पोलिस स्टेशन व स्थानिक गुन्हे शाखेच्या पथकाने कौतुकास्पद कामगिरी केली आहे.तावशी ता.इंदापुर,जि.पुणे गावाच्या हद्दीमधील स्मशानभुमीमध्ये दि.१६/११/२०२४ रोजी सकाळी ०९.३० वाजण्याच्या सुमारास लाकडामध्ये मानवी किंवा अमानवी अवयव जळत असून त्याच्याकडेल जास्त प्रमाणात रक्त पडलेले आहे, अशी माहिती वालचंदनगर पोलिस स्टेशनला तावशी येथील पोलिस पाटलांकडुन मिळाली. त्यामुळे वालचंदनगर पोलिस स्टेशनचे प्रभारी अधिकारी राजकुमार डुणगे व इतर पोलिस कर्मचार्यांनी तात्काळ घटनास्थळी जावून पाहणी केली असता पुर्व बाजुस ४० फुट अंतरावर रक्त सांडलेले दिसत होते. तसेच लोखंडी जाळीच्या बाजुस जळालेली लाकडे व इतर लाकडे दिसत होती.परंतु त्या ठिकाणी नेमके काय जळाले आहे,याबाबत कोणताही बोध होत नव्हता.
त्यावेळी घटनास्थळी घडलेल्या प्रत्येक गोष्टींचा बारकाईने पाहणी करत असताना प्राथमिकदृष्ट्या हा घातपाताचा प्रकार दिसून येत असल्याने पोलिस स्टेशन येथे स्टेशन डायरीस नोंद करुन पुढील तपास सुरू केला.सुचनांप्रमाणे वालचंदनगर पोलिस स्टेशन व स्थानिक गुन्हे शाखेचे पथक तयार करुन इंदापुर, माळशिरस व फलटण तालुक्यामध्ये जावुन तांत्रिक व गोपनीय बातमीदारामार्फत तपास केला. परंतु काही एक माहिती मिळत नव्हती. स्मशानभुमीमध्ये मिळून आलेली जळकी व शिल्लक लाकडे ताब्यात घेवून ती कोणत्या वखारीमधील आहेत, याचा तपास करत असताना सदरची लाकडे ही गुणवरे ता.फलटण येथील वखारीमधील असल्याची गोपनीय माहिती दि.१८/११/२०२४ रोजी प्राप्त झाली. त्यानुसार तपास करत असताना गुणवरे ता.फलटण येथील वखारीतुन दादासाहेब मारुती हरिहर वय ३० वर्षे रा.गोखळी, ता.फलटण,जि.सातारा व त्याचा मित्र विशाल सदाशिव खिलारे वय २३ वर्षे रा.गोखळी,ता.फलटण, जि.सातारा यांनी लाकडे खरेदी करुन मयताच्या अंत्यविधीकरीता वाहनांमध्ये घेवून गेल्याचे सांगितले. त्याप्रमाणे दोघांचा शोध घेवुन त्यांना ताब्यात घेवून विचारपुस केली असता त्यांनी गंगाखेड जि. परभणी येथील जगताप मामा याचा आरोपी क्रमांक ०१ दादासाहेब मारुती हरिहर याच्या बायकोवर वाईट नजर असल्याच्या कारणावरुन दोन्ही आरोपींनी कट रचुन मयतास गंगाखेड येथुन सतोबाची यात्रा टाकेवाडी, ता.माण,जि.सातारा येथे जेवण करण्याच्या निमित्ताने सोबत घेतले.
दि.१५/११/२०२४ रोजीच्या मध्यरात्री मौजे तावशी ता.इंदापुर जि.पुणे येथील स्मशानभुमीजवळ लघवीला म्हणून गाडी थांबवली.त्यानंतर मयताच्या डोक्यात लाकडी दांडक्याने मारहाण त्यास जिवे ठार मारुन पुरावा नष्ट करण्याच्या उद्देशाने मयतास स्मशानभुमीमध्ये जाळले आहे.
आरोपीकडून मिळालेल्या माहितीच्या आधारे मयताच्या नातेवाईकांचा शोध घेवुन मयताची ओळख पटवुन मयताचे नाव हरिभाऊ धुराजी जगताप वय ७४ वर्षे रा.गंगाखेड, परभणी असे असल्याचे निष्पण झाले. मयताचे नातेवाईक सचिन हरिभाऊ जगताप वय ४६ वर्षे,रा.सध्या कोल्हापुर यांना याबाबत सविस्तर माहिती देवुन त्यांची घडलेल्या प्रकाराच्या अनुषंगाने लेखी फिर्यादी घेवुन गु.रजि. नंबर ४९५/२०२४ भारतीय न्याय संहिता कलम १०३ (१), ६१ (२), २३८.३ (५) प्रमाणे वरील दोन्ही आरोपी यांचे विरोधात दि.१९/११/२०२४ रोजी गुन्हा दाखल करण्यात आला आहे.या गुन्ह्याचा तपास वालचंदनगर पोलिस स्टेशन पुणे ग्रामीणचे पोलिस उपनिरीक्षक मिलींद मिठापल्ली हे करत आहेत.
दोन्ही आरोपींंना दि.२५/११/२०२४ राजी पोलिस कस्टडी मिळाली आहे. सदर घटनेमध्ये तावशी स्मशानभुमीमध्ये नक्की काय घटना घडली आहे याची पुर्णपणे शाश्वती नसताना तसेच त्याबाबत कोणाताही पुरावा नसताना केवळ स्मशानभुमीमध्ये मिळुन आलेल्या लाकडांवरुन व तिथे सांडलेल्या रक्तांवरुन घातपाताचा संशय बळावल्याने वालचंदनगर पोलिस स्टेशन व स्थानिक गुन्हे शाखेच्या अधिकारी व अंमलदार यांनी अतिशय कौशल्यपुर्ण पध्दतीने तपास करुन सदरचा गुन्हा उघडकीस आणुन कौतुकास्पद कामगिरी केली आहे.
ही कामगिरी पुणे ग्रामीणचे पोलिस अधिक्षक पंकज देशमुख, अपर पोलिस अधिक्षक गणेश बिरादार बारामती विभाग, उपविभागीय पोलिस अधिकारी डॉ.सुदर्शन राठोड बारामती उपविभाग,पोलिस निरीक्षक अविनाश शिळीमकर स्थानिक गुन्हे शाखा विभाग पुणे ग्रामीण यांच्या मार्गदर्शनात सहायक पोलिस निरीक्षक राजकुमार डुणगे, सहायक पोलिस निरीक्षक कुलदीप संकपाळ स्थानिक गुन्हे शाखा तसेच सहाय्यक पोलिस फौजदार बाळासाहेब कारंडे,पोलिस हवालदार शैलेश स्वामी, पोलिस हवालदार गुलाबराव पाटील ,पोलिस हवालदार गणेश काटकर ,पोलिस हवालदार अजित थोरात ,पोलिस हवालदार स्वप्नील अहिवळे,पोलिस हवालदार अजय घुले , पोलिस हवालदार निलेश शिंदे पोलिस अंमलदार विक्रमसिंह जाधव ,पोलिस अंमलदार अभिजीत कळसकर यांनी पार पाडली आहे.
या कामगिरीबाबत वालचंदनगर पोलिस स्टेशन व स्थानिक गुन्हे शाखेचे अधिकारी व अंमलदार यांचे वरिष्ठ अधिकारी तसेच नागरिकांकडून अभिनंदन केले जात आहे.
