सोड्डी परिसरात पोलिसांनी छापा टाकून शेतात लावलेला 8 लाख 79 हजार रुपये किमतीचा गांजा केला जप्त
मंगळवेढा पोलिसांची मोठी कारवाई
मंगळवेढा/ज्ञानप्रवाह न्यूज – मंगळवेढा तालुक्यातील सोड्डी हद्दीत गांजाचे मादक व नशाकारक वनस्पतीच्या झाडांची बेकायदेशीररित्या लागवड केल्याप्रकरणी पोलिसांनी सदर ठिकाणी छापा टाकून 43 किलो 958 ग्रॅम वजनाचा गांजा 8 लाख 79 हजार 160 रुपये किमतीचा मुद्देमाल जप्त करून सोमण्णा रामण्णा बिराजदार वय 58 याच्याविरूध्द गुन्हा दाखल केला आहे.ही कारवाई कोल्हापूर परिक्षेत्राचे पोलिस उपमहानिरिक्षक सुनिल फुलारी यांच्या मार्गदर्शनाखाली करण्यात आली.
पोलिस सुत्रांनी दिलेल्या माहितीप्रमाणे,सोड्डी परिसरात असलेल्या गट नं.324/1/ब/2 मध्ये गांजाची लागवड केली असल्याची गोपनीय माहिती नुकताच महाराष्ट्र शासनाचा आदर्श पुरस्कार मिळालेले पोलिस निरिक्षक दत्तात्रय बोरीगिड्डे यांना मिळताच त्यांनी पोलिसांचे एक खास पथक पाठवून सदर घटनेची शहनिशा करून घेतली.तद्नंतर सोलापूर ग्रामीणचे पोलिस अधिक्षक अतुल कुलकर्णी,अप्पर पोलिस अधिक्षक प्रितम यावलकर,मंगळवेढयाचे डी.वाय.एस.पी. विक्रांत गायकवाड यांच्या मार्गदर्शनाखाली दि.5 रोजी 3.15 वा. सदर पथक शासकिय गाडीने घटनास्थळी पोहोचले. त्यावेळी वरील आरोपी उपस्थित होते.त्यांना आपल्या शेतात कोणकोणती पिके आहेत असे पथकाने विचारले असता शेतात जवस,सिताफळ, चिक्कू,पपईची लागवड केल्याचे आरोपीने सांगितले.
मिळालेल्या गोपनीय माहितीच्या आधारे पोलिसांनी शेतामध्ये शोध घेतला असता दगडी घराच्या बांधकामाच्यासमोर जवसाच्या पिकासोबत साधारण दोन फुटापासून सहा फुट उंचीची लहान मोठी गांजाची हिरव्या रंगाची पाने फुले व बोंडे असलेली झाडे पोलिसांच्या निदर्शनाला आली.याबाबत आरोपीस विचारणा केली असता गांजा सेवन करण्याची सवय असल्याने ती चोरून लावली असल्याचे आरोपीने पथकासमोर सांगितले.पोलिसांनी 43.958 किलो ग्रॅम वजनाचा गांजा त्याची अंदाजे किंमत 8 लाख 79 हजार 160 रुपयांचा मुद्देमाल जप्त केला.
ही कारवाई सहाय्यक पोलिस निरिक्षक अंकुश वाघमोडे, पोलिस उपनिरिक्षक विजय पिसे,नागेश बनकर,अनिल गडदे, पोलिस हवालदार दिगंबर गेजगे,पो.ना.सचिन बनकर, पोलिस अंमलदार महेश कोरे,सुरज देशमुख,बंडोपंत पुजारी, श्रीकांत देवकते, चालक हरीदास चौधरी आदींनी केली. याची फिर्याद पोलिस नाईक सचिन बनकर यांनी दिली असून याचा अधिक तपास मंगळवेढा पोलिस करीत आहेत.
मंगळवेढा येथे प्रथमच एवढा मोठा गांजा लागवड सापडल्याने खळबळ उडाली आहे.सदरचे ठिकाण हे कर्नाटक सीमेपासून केवळ 7 ते 8 किमी.अंतरावर असल्याने तस्करी करण्याचा इरादा असावा असा संशय व्यक्त केला जात आहे.
